Mat 12 | KYG | STEP | Mago Sapati afina'mo Yesu'e ge'amo ne'afiya vaya'e'mo viti hoyafi'mo umenitata hu'nae. Ge'amo ne'afiya vaya'mo apaka te'nige'apae'mo viti alagamo lagi'a neme neme u'nae.

Matthew 12

Sapati afina kavafe'mo hu'niya gemae

(Mak 2:23-28; Luk 6:1-5)

1 Mago Sapati afina'mo Yesu'e ge'amo ne'afiya vaya'e'mo viti hoyafi'mo umenitata hu'nae. Ge'amo ne'afiya vaya'mo apaka te'nige'apae'mo viti alagamo lagi'a neme neme u'nae. 2 Falasi mono vaya'mogimo apakete'apae'mo Yesufe'mo, Apako, hu'a, gekamo ne'afiya vaya'mogimo Sapati afina ke'aepa gemo ago amagi'a ne'atalae, hu'a ha pai'nageno'ae'mo, 3 Nevini'a avagi hu'a u'naya vaya'mo apaka te'nige'apae'mo hu'naya kavafe'mo ava gemo lekana paitapa o'afi'nafiye. 4 Agaemo Goti mono nopi'mo faleno hai'nige'apae'mo agae'e vaya'a'e'mo Goti'mo ofalinimo ami'naya peleti mayamo ali'a ne'nae. Muki vaya'mogimo no'naya peleti mayamo hane'niyana mono hu'a ne'apataya vaya'amogige'mo ne'naya peleti mayamo ne'naya'monanafa hosu kava'mo osu'nae. 5 Ke'aepa gemo'mo huno'ae'mo, mono hu'a ne'apataya vaya'mogimo Sapati afina'mo alopa mono nopi'mo ali'ya'mo ali'nayana ke'aepa gemo'mo huno'ae'mo, Sapati afina'mo ali'ya'mo o'aliyo, huno hu'niya gemo amagi'a ne'atalaya'monanafa vai'mo no'aliye, huno avo'mo kae male'niya gemo lekana paitapa o'afi'nafiye. 6 Lapa pai'nae'mo, mago vekamo agi'amo'mo alopa mono no'mo agi'amo ago aeno aga se'niya vekamo manifi'mo mai'niye. 7 Goti'a huno'ae'mo,

Afumo he'a ofalinimo namisayafe'mo o'nahau'niya'monanafa hapau hu'a apatesayafeke'mo nahau'niye,
huno avo'mo kae male'niya gemo aepa'amo lapakaemo afi'naesinana hosu kava'mo osu'naya vaya'aife'mo hosu kava'mo hu'nae, hutapa osu'naesine. 8 Vemo mafa'nemo'a Sapati afinate'mo yagaino ne'ateya'mofe'mae, huno hapa pai'niye.

Kalaisi'a aya'mo aeno ape le'niya vekamo alino api aino ate'niya gemae

(Mak 3:1-6; Luk 6:6-11)

9 Yesu'a ani kotegati'mo ataleno uno Yu vaya'ai mono nopi'mo uno hai'niye. 10 Mago vekamo aya'mo aeno ape le'niya vekamo ani nopi'mo mai'niye. Mago vaya'amogimo agoti hu'a atesayafe'mo, mago vekamo'a Sapati afina'mo kaita hau'nisiya vekamo alino hageno atesiya'mo'mo ke'aepa gemo amagino ne'atalefiye, hu'a ge hu'a afi ge'nae. 11 Afi ge'nageno'ae'mo, lapakaepati'mo mago vekamo'a sipisipi'amo Sapati afina'mo kelifi'mo asagauno ai'nisiyana uno lamino asagaulino hai negaifi hai no'megaiye. 12 Ma mopafi vaya'mogimo sipisipi anaga'mo ago ae'a apaka se'a mai'naya'mofe'mo Sapati afina'mo vaya'mo hapa ne'maeya kava'mo'a ke'aepa gemo amagino no'ataleya kava'mo hane'niye, huno hapa paiteno 13 ani vekae'mo, kaya'mo aeka hayo huvo, huno hu'nigeno aeno hayo nehigeno'ae'mo aya'mo alino api aino ate'nigeno afa'a hane'niya ayakana huno alagepa huno hane'niye. 14 Falasi mono vaya'mo atale'u'a Yesu'mo atafau'a amagisayafe'mo ali'a anupa hu'a mai'ne'a ge huge afige hu'a mai'nae.

Goti'a ali'ya'amo alisiya vekamo lekana paino ate'niya vekae'mo ava gemo hu'niya gemae

15 Yesu'a ani ava gemo hu'naya gemo ago afiteno'ae'mo ani koteti'mo ataleno u'nige'a asole vaya'mo akame hu'a u'nageno'ae'mo alu kaita alu kaita'mo hapau'niya vaya'mo alino hapageno apate'niye. 16 Gotitegati gemo alinino eno aeno hakalo huno hapa nepaiya vekamo agi'amo Aiyeya'a hu'niya gemo afole aisiyafe'mo Yesu'a huno'ae'mo, Nava gemo hutapa hapa opaiyo, huno hapa pai'niye. 18 Aiyeya'a huno'ae'mo,

Ageyo, huno, ago lekana pai'na ate'nova vekamo ali'ya'nimo alisiya veka'nimo manile'mo mai'niye. Nahau nayamopafi'mo nahau'niya vekamoge'na amuse hu'na ne'atove. Naune'name'mo ali'na amisugeno muki alu nofi vaya alu nofi vaya'aife'mo fatago kavafe'mo ava gemo aeno hakalo huno hapa paigiye. 19 Ge ohapauge alopa gefati'mo osuge taoni kate'mo vaya'ai apaulagale'mo he tino mai'neno aeno hakalo huno hapa opaige huno maigiye. 20 Hopamo aise'amo aino lo ae'niya hopa kayo'mo alino lo o'aegaiye. Lamufi vikimo'mo hokanufa'age'mo hane'nigeno halinamo ne'aiya vikimo alino yu osegaiye. Ani kava osugiya'monanafa ali'ya'mo alime alime ne'visigeno fatago kava'ae'mo ava gemo alino atesigeno visigeno'ae'mo ali'ya'aleti'mo ne'ya'amo alagi afole aigiye. Afole aisige'a alu kotega alu kotegamo mai'naya vaya'mogimo agaefe'mo, laha maegaiye, hu'a hute'a agava maigae,
huno avo'mo kae male'niye.

Hosu apaune vaya'mo ali'a hapa fai'a ne'apatalaya kavafe'mo apava gemo hu'niya gemae

(Mak 3:20-30; Luk 11:14-23; 12:10)

22 Ani afina'mo mago vaya'mogi hosu aune vekamo aipafi'mo mai'niya vekamo aulagamo ali hu'nigeno agemo no'aiya vekamo avaleli'a Yesutegamo e'nageno Yesu'a alino alagepa huno ate'nigeno aulagamo ageno ayaketeno ge lagau'niye. 23 Muki vaya'amogimo agete'a hapau aite'apae'mo, agava mai'nona vekamo Nevini aginago'amo mai'nifi, hu'a hu'nae. 24 Hu'a hu'nage'a Falasi mono vaya'mogimo afite'apae'mo, hosu apaune vaya'ai ala kava ne'apimo Mielisemuli'a himamu'amo alino ami'nigeno'ae'mo hosu apaune vaya'mo alino hapa faino ne'apatale, hu'a hu'nae.

25 Yesu'a Falasi vaya'mogi apaipafi'mo apakesamo afi'naya apakesamo apaketeno'ae'mo, magoke kote'mo ne'maisaya vaya'mogimo ali'a fako hu'a apatete'a kame hisayana apakai'apimo hapae'a hano hu'a apatalegae. Ani kava hu'a magoke afamo anaga'mogimo ali'a fako hu'a apatete'a kame hisayana alagi alagepa hu'a o'maigae. 26 Satani'a vaya'amo alino hapa faino apatalesiyana agaetegati'mo alagi alino fako huno apatalegaiye. Alino fako huno ne'apatesiyana haiya kava hu'a Satani'a yagaino ne'apateya vaya'mo afa'a maigae. 27 Lapakaemo nagaefe'mo, Mielisemuli himamu'aleti'mo hosu apaune vaya'mo alino hapa faino ne'apatale, hutapa nehaya'monanafa vayatapimogimo ina la himamu'aleti'mo ali'a hapa fai'a ne'apatalae. Vayatapimogi, hosu gemo nehae, hu'a hute'a ali'a fako hu'a lapategae. 28 Nagaemo Goti Auneme'aleti'mo hosu apaune vaya'mo ali'na hapa fai'na ne'apatalesuvana Goti'a yagaino ne'apateya kava'mo lapakaete'mo ago eno afole ai'niye.

29 Mago vekamo'a lokiya vekamo aiya ayate'mo nofi kino o'ate'nisiyana no'afati'mo haino kagemi ya'amo alinino o'ugiye. Hogoteno atafauno aiya ayate'mo nofi kino ate'nisiyana no'afati'mo haino kagemi ya'amo alinino ugiye.

30 Mago vekamo nao ne'mo o'mai'nisiyana kame'nimo mai'niye. Mago vekamo'a ali'na anupa hu'na apatesuvafe'mo naha no'maesiyana alino atagu faeno alino hapa faino ne'apatale. 31 Ani kavatefe'mo mani gemo lapa nepauve, huno, Goti'a muki alu hosu kava alu hosu kava'e hu'a faipa hu'a ne'apataya ge'e'mo afa'a alino atalegaiya'monanafa Goti Auneme'ae'mo hu'a faipa hu'a atesaya hosu ge'apimo alagi alino o'atalegaiye. 32 Mago vaya'mogi Vemo mafa'nee'mo hu'a faipa hu'a atesaya hosu kava'apimo afa'a alino atalegaiya'monanafa aote Auneme'ae'mo hu'a faipa hu'a atesaya hosu kava'apimo hemenimo alino o'atalege afole aisiya afina'mo alagi alino o'atalege huno alino o'atalegaiye.

33 Alagepa alagamo ne'ae, hutapa lapakesa afi'nisayana alagepa yosamo hane'niye, hutapa lapakesa afiyo. Hosu alagamo ne'ae, hutapa lapakesa afi'nisayana hosu yosamo hane'niye, hutapa lapakesa afiyo. Yosa alaga'amo agete'apaeke'mo na agufa yosamo hane'nifi hu'a ne'agaya'mofe'mae. 34 Nagalo'yave afamo anaga vaya'mogitapae, hu'na, hosu vaya'mo mai'naya'mofe'mo haiya kava hutapa alagepa gemo afa'a hugae. Vaya'ai apaipafi'mo na agufa ya'mo havaite'nifi ani kava huno aino vali lamino asagauno ne'aige'apae'mo gemo nehae. 35 Alagepa vekamo'a kesi'afi'mo alagepa ya'age'mo ageno male'niya yapati'mo alagepa ya'age'mo alino afole ne'aiye. Ani kava huno hosu vekamo'a kesi'afi'mo hosu ya'age'mo ageno male'niya yapati'mo hosu ya'age'mo alino afole ne'aiye. 36 Lapa nepauve, agoti huno apatesiya afina'mo Goti'a muki gemo fiku nehaya gelefe'mo apakenoka huno apafi gegaiye. 37 Goti'a getapifike'mo alino fako huteno'aeke'mo mago vaya'aife'mo, fatago vaya'mo mai'nae, huno hapa paige mago vaya'aife'mo, hosu vaya'mo mai'nae, huno hapa paige hugiye, huno hapa pai'niye.

No'agaya lokiya aune kava'mo huvo, hu'a ha pai'naya gemae

(Mak 8:11-12; Luk 11:29-32)

38 Mago Falasi mono vaya'e ke'aepa gemo avo'mo kae'a ali'a apaya ne'malaya vaya'mogi'e'mo, Tisao, hu'a, no'agona lokiya kaune kava'mo huka alika lave lisanafe'mo hugeta ageno, hu'a ha pai'nageno'ae'mo, 39 hosu vaya'mogi Goti'a anau'apimokana ne'mo atale'a kumai he'a ugekana hu'a ne'maiya vaya'mogimo no'agaya lokiya aune kava'mo ali'na apave lisuge'a agesayafe'mo nehaya'monanafa no'agaya lokiya aune kava'mo hisuge'a o'agegaya'monanafa Yonategamo afole ai'niya agufa aune kavake'mo alino apave lisige'a agegae. 40 Yona'a alopa noyamemo agupafi'mo lole'e mago'e feluga'e lole'e mago'e hani'ilaga'e'mo mai'niya kava huno Vemo mafa'nemo'a lole'e mago'e feluga'e lole'e mago'e hani'ilaga'e'mo mopa agusafilagamo lamino maigiye. 41 Akeya'vilagamo Niniva taonifi'mo mai'naya vaya'mogimo Goti'a muki vaya'mo agoti huno apatesiya afina'mo he ti'a hemenimo mai'naya vaya'aife'mo, lapakaemo hosu kava'mo hu'nae, hu'a hapa paigae. Na kava hinage'apaene. Yona'a Goti ge'amo aeno hakalo huno hapa pai'nige'a afite'a apaipamo ali'a afe le'naya'monanafa hemenimo manile mai'niya vekamo'a Yona'mo ago aeno aga seno mai'niya vekamo'a Goti ge'amo aeno hakalo huno hapa nepaige'apae'mo hemenimo mai'naya vaya'mogimo apaipamo ali'a afe nolaya'mofe'mae. 42 Akeya'vilaga hoga haopalega mai'naya vaya'aite'mo yagaino ne'apateya kuvini a kanomo'a Salomoni'mo ageteno afi'niya gemo afisiyafe'mo e'niye. Manile'mo mai'niya vekamo'a Salomoni'mo ago aeno aga seno mai'niya'monanafa ge'amo no'afiya'mofe'mo ani a kanomo Goti'a agoti huno apatesiya afina'mo he tino hemenimo mai'naya vaya'aife'mo, lapakaemo hosu kava'mo hu'nae, huno hapa paigiye.

43 Hosu aune vekamo mago vekamo aipafati'mo lamiteno maino falu hisiya ya'mo agesiyafe'mo ani'mo ohane'niya kotegamo umenitata huno kahau ya hume hume u'niya'monanafa o'age'niye. 44 O'ageno'ae'mo, halate ai'na atagine'na u'na no'nifi'mo maiguve, huno huteno uno ava'yi huteno ageyana no'afi'mo vaya'mo o'mai'nageno mumusopamo ohaneno alagepa huno hane'nigeno age'niye. 45 Ageteno ataleno uno seveni'a hosu apaune vaya'mogi mago'e hu'a hosu kava'mo hu'a ae'a aga se'a mai'naya vaya'mo apavalelino uno ani vekamo aipafi'mo hai'a magokepi lokae'a mai'nae. Mai'nageno'ae'mo ani vekamo hogoteno hosu kava'mo huno mai'niyana henaga'amo mago'e huno lusi hosu kava'mo huno mai'niye. Ani kava'mo'a hemenimo ne'maiya vaya'aite'mo afole aigiye, huno hapa pai'niye.

Yesu ita'amo'e agana'amogi'e'mo Yesutegamo e'naya gemae

(Mak 3:31-35; Luk 8:19-21)

46 Yesu'a vaya'aife'mo gemo hapa nepaige'apae'mo ita'amo'e agana'amogi'e'mo e'a ava'yi hute'a gemo ha paisayafe'mo kumatega agava mai'nae. 47 Mago ne'mo'a, itakamo'e kaganakamogi'e'mo gemo kaha paisayafe'mo e'a kumate'mo mai'nae, huno ha pai'nigeno'ae'mo Yesu'a, ita'nimo'mo haiya'ale'mo mai'niye. 48 Konaga'nimogimo haiya'ale'mo mai'nae, huno ha pai'niye. 49 Agaemo ge'amo ne'afiya vaya'aifeke'mo aya ako'ya nehuno'ae'mo, Apakeyo, huno, ita'nimogi nagana'nimogimo mai'nae. 50 Koku'napi afo'nimo'mo hau'niya kava'age'mo nehaya vaya'mo nagana'nimogimo maige nasa'nimogimo maige ita'nimogimo maige hu'a mai'nae, huno hapa pai'niye.